Mkazi moja wa Kijiji cha Ntewa Kata ya Ntuntu wilayani Ikungi Mkoa wa Singida Juma Abdalah (44) amefariki dunia baada ya kupigwa kwa kipande cha mti usoni na mke wake baada ya kumtuhumu kumwibia sh. 25,000/.
Kwa mujibu wa Kamanda wa Polisi Mkoa wa Singida Kamishina Msaidizi Mwandamizi wa Polisi Geofrey Kamwela, tukio hilo lilitokea mnamo tarehe 2 mwezi huu saa 7.00 mchana, ambapo mtuhumiwa Veronika Hamisi (25) ambaye ni mke wa marehemu anadaiwa kufanya kitendo hicho.
Katika taarifa yake iliyotolewa kwa vyombo vya habari jana mjini Singida, Kamwela alieleza kuwa siku hiyo marehemu pamoja na mkewe walikuwa wametoka kilabu cha pombe ya kienyeji, na walipofika nyumbani marehemu alichukua sh. 25,000/= zilizokuwa zimehifadhiwa katika pochi.
“Fedha hiyo ambayo inadaiwa ilikuwa ni mali ya mwanamke huyo, alidai arudishiwe kiasi hicho na mme wake, lakini jambo hilo halikuwezekana” alisema Kamanda Kamwela.
Alibaini kuwa baada ya juhudi za kumnyan’ganya fedha hiyo marehemu kutofanikiwa ndipo Veronika Hamisi alipoita wanaume wengine wawili ambao bado hawajajulikana na kushirikiana naye ili iweze kurudishwa.
Alisema kuwa katika purukushani hizo ndipo mtuhumiwa alipopata nafasi ya kuchukua kipande cha mti na kumpiga mme wake kichwani sehemu ya paji la uso na kufariki papo hapo, wakati wanaume hao wawili walikimbia kusiko kujulikana.
“Uchunguzi wa kina wa tukio hilo la aina yake katika mwanzo wa mwaka unaendelea ikiwa ni pamoja na kuwakamata watuhumiwa wengine wawili wanaosadikiwa kushirikiana na mke wa marehemu kufanya kitendo hicho”. Alisema Kamanda huyo.
Aliongeza kuwa mke wa marehemu amekamantwa na jeshi la polisi kuhusiana na tukio hilo na anatarajiwa kufikishwa mahakamani kujibu tuhuma zinazomkabili mara uchunguzi huo utakapokamilika.
No comments:
Post a Comment