MALIASILI WAONYWA KUTOJIHUSISHA NA RUSHWA, UJANGILI

Watumishi wa Serikali Wizara ya Maliasili na Utalii wametakiwa kutimiza wajibu wao ipasavyo kwa kufanya kazi kwa bidii na kujiepusha na vitendo vya rushwa kuhakikisha jukumu kuu la Wizara hiyo linafikiwa ambalo ni kuendeleza Uhifadhi wa Maliasili, Malikale na Kuendeleza Utalii nchini.

Agizo hilo limetolewa na Katibu Mkuu wa Wizara hiyo Maj. Gen. Gaudence Milanzi akifungua Mkutano wa 23 wa Baraza la Wafanyakazi uliofanyika jana katika Chuo cha Taifa cha Utalii, tawi la Bustani, Jijini Dar es Salaam.

Alisema kuwa kila mtumishi katika nafasi yake anatakiwa kuwa mbunifu, kuongeza maarifa katika kutekeleza majukumu yake ipasavyo na kuacha tabia ya kufanya kazi kwa mazoea.

Amewataka pia watumishi hao kuwa waadilifu, kufanya kazi kwa ushirikiano na kujiepusha na makundi yasiyokuwa na tija kwa Wizara na Serikali kwa ujumla. 

Alionya kuwa, Mtumishi yeyote atakeenda kinyume cha sheria na taratibu hatosita kuchukuliwa hatua za kinidhamu ikiwemo kuachishwa kazi ili kwenda sambamba na kauli mbiu ya Serikali ya awamu ya tano ya "HAPA KAZI TU"

“Mtumishi ambaye hatakua pamoja na sisi katika kutii sheria, kanuni na taratibu kwa kujihusisha na vitendo vya rushwa na ujangili tutamuondoa” Alisema Maj. Gen. Milanzi.

Amesema imekuepo tabia ya baadhi ya watumishi kujihusisha na vitendo vya rushwa na wengine kushiriki kwenye matukio ya Ujangili jambo ambalo linaipatia Wizara sifa mbaya. Alisisitiza kuwa vitendo kama hivyo kwenye Serikali ya awamu ya tano havitakuwa na nafasi.

Wakizungumzia changamoto mbalimbali zinazowakabili katika kutekeleza majukumu yao ipasavyo, watumishi wa Maliasili waliopata fursa ya kuchangia walisema changamoto kubwa ni uhaba wa fedha na vitendea kazi muhimu hususani kwa wale wanaohudumia Mapori ya Akiba na Mapori Tengefu.

Maj. Gen. Milanzi alimuwakilisha Waziri wa Wizara ya Maliasili na Utalii Prof. Jumanne Maghembe ambaye yupo kwenye majukumu mengine ya Kiserikali Mkoani Dodoma.

Hamza Temba - Afisa Habari

Wizara ya Maliasili na Utalii

0713 635204

0785 798011