GOOGLE YATOA TEKNOLOJIA YA MIWANI YA AJABU

Mwanzoni wa mwaka 2012, kabla dunia haijasikia miwani ya Google, palikuwa na uvumi mkubwa kwamba kampuni hiyo iko katika mkakati wa kutoka na miwani ya ajabu.

Siku zilivyo kuwa zinakwenda, ni wazi haukuwa uzushi bali ni ukweli mtupu, lakini ndoto ya timu ya wataalamu wa Google kutoka na kifaa kitakachovaliwa kama miwani haikuwa karibu kiasi cha kutoa na kutambulisha teknolojia hiyo kama watu walivyotarajia.

Lakini kwani ni kitu gani hicho ambacho kinazoa akili za watu na kusubiri kwa hamu kubwa?

Miwani hii (Pichani) maarafu kama ‘Google Glass’ ni kifaa ambacho kitakuwa na uwezo wa kufanya kazi kama kompyuta yako ya mezani au simu au hata ipad, lakini tofauti ni kwamba safari hii itakuwa kwenye macho yako kama picha inavyoonesha juu.

Kwa urahisi tu, Google Glass ni kamera, kioo kinachoonesha kama skrini yako ya kompyuta au simu, ina teknolojia ya kugusa kama simu za siku hizi (touch screen), inatumia betri, na ina kipaza sauti (micrphone) vyote hivyo vimewekwa ndani ya miwani ili uweze kuona na kufanya vitu ukiwa katika shughuli zako, kama kuangalia sinema, kupiga picha, kurekodi video, kutafuta vitu mbalimbali na hata kutafsiri mambo mbalimbali ukiwa unatembea.

Kifaa hicho ambacho kinaongelewa sana sasa hivi kipo katika majaribio kwa zaidi ya wiki kadhaa sasa. Google inategemea kuuza miwani hiyo kwa bei ya dola za kimarekani 1,500 nchini marekani, na kuingiza rasmi sokoni kufikia mwishoni mwa mwaka 2013.