ONYO KALI: DEREVA, KONDA HAKUNA KUSHUKA KWENDA KUONGEA NA TRAFIK

Kibaha

(kutoka Gazeti la Majira) Katika kupambana na kuzuia ushawishi wa vitendo vya rushwa kwa baadhi ya makondakta na madereva wa mabasi dhidi ya askari polisi kikosi cha usalama barabarani (trafiki), jeshi la polisi mkoa wa Pwani limepiga marufuku madereva na makondakta wa mabasi kushuka ndani ya magari yao kwa lengo la kupeleka kadi kwa trafiki ili kukaguliwa.

Akizungumza na majira mjini Kibaha juzi, Kamanda wa Jeshi la Polisi, Kikosi cha Usalama Barabarani Mkoa wa Pwani, Nassor Sisiwaya alisema, kumekuwepo na malalamiko na hisia kwa baadhi ya watu ya kwamba, kondakta au dereva wa basi anaposhuka kupeleka kadi kwa trafiki ili ikaguliwe, kadi hiyo huishikanisha na fedha ambayo humpa trafiki kama rushwa ili asimchukulie hatua za kisheria katika makosa ya usalama barabarani atakayokuwa ameyatenda.

Kamanda Sisiwaya amesema, ili kuondoa mtazamo huo na vishawishi hivyo vya rushwa amepiga marufuku dereva au kondakta kushuka ndani ya gari kumfuata trafiki badala yake trafiki atapanda ndani ya gari ambapo atakagua na kuuliza maswali hadharani mbele ya abiria.

"Askari wa usalama barabarani kwa ujumla wao nchi nzima, wamekuwa wakilalamikiwa sana kujihusisha na vitendo vya rushwa, sikatai kuwepo kwa askari mmoja mmoja mwenye tabia hizo kutokana na tabia yake kama binadamu, lakini sikubaliani na trafiki wote kujumuishwa katika tabia hiyo chafu ya kuomba na kupokea rushwa ili kupindisha sheria kwani, naamini asilimia kubwa ya askari wetu ni waadilifu katika kutekeleza majukumu ya kazi yao na kusimamia sheria za usalama barabarani kikamilifu" alisema Sisiwaya.

Alisema ili kuondoa hisia na dhana potofu miongoni mwa wana jamii, amepiga marufuku katika mkoa wake dereva na kondakta kushuka kwenye gari na kumfuata trafiki kibandani au nyuma ya gari badala yake trafiki ataingia ndani ya gari kufanya ukaguzi na kuhojiana na kondakta mbele ya abiria, kama ana ugonjwa wa kuomba na kupokea rushwa, aiombe na kuipokea hadharani mbele ya abiria ambao amewaomba kutoa taarifa sahihi na za kweli kwa uongozi wa polisi kuhusu trafiki yeyote watakayembaini akipokea rushwa.

"Katika stendi ya mabasi Maili Moja, Kibaha, jeshi la polisi kwa kushirikiana na kamati ya usalama barabarani ya mkoa, tutafunga maspika makubwa ambayo yatatumika kuwatangazia makondakta na madereva kutokushuka katika magari yao na kuwataka wabaki ndani wakimsubiri trafiki kuwakagua ndani ya basi, mbele ya abiria" alisema Sisiwaya.

Alisema kwamba, uongozi wa jeshi la polisi mkoa wa Pwani, na kikosi cha usalama barabarani cha jeshi hilo halitamvumilia askari yeyote atakayebainika kujihusisha na vitendo vya rushwa , hatua kali za kinidhamu zitachukuliwa dhidi yake ikiwa ni pamoja na kufukuzwa kazi.

"Haiwezekani jeshi zima kuchafuliwa na watu wachache, waroho wafedha, wanaokiuka maadili ya jeshi na kujihusisha na vitendo vya rushwa, kama wapo kweli askari wenye tabia hizo ndani ya mkoa wa Pwani, waache mara moja kwani, viongozi wao tumejipanga kikamilifu kuwasaka na kuwakamata kwa ushirikiano na wananchi na pale tutakapomkamata askari kwa kuomba na kupokea rushwa, tutamshughulikia vilivyo kwa mujibu wa sheria ili awe mfano na funzo kwa wengine wenye mchezo na tabia hizo chafu za kuomba na kupokea rushwa" alisema Sisiwaya

Aidha katika hatua nyingine Kamanda Sisiwaya alisema, pamoja na changamoto zilizopo, jeshi la polisi Pwani limejipanga kukomesha ajali zote za barabarani zinazosababishwa na uzembe na ulevi wa madereva wakati wakiendesha.

Alisema kipindi cha sikukuu ya Krismas na mwaka mpya, ajali nyingi hutokea, lakini katika kipindi cha sikukuu hizo musimu huu, walidhibiti vyanzo vyote vya ajali hizo kiasi kwamba hakuna akali hata moja iliyotokea ndani ya mkoa wa Pwani katika kipindi chote cha sikukuu ya krismas na mwaka mpya.