LEMBELI ATAKIWA KUMUOMBA RADHI MAIGE

Shinyanga 

Katika hali isiyokuwa ya kawaida wakazi wa jimbo la Msalala wilayani Kahama mkoa wa Shinyanga wamemuomba mwenyekiti wa Kamati ya kudumu ya bunge ya ardhi, maliasili na mazingira, James Lembeli(Pichani kushoto) kumuomba radhi Mbunge wa jimbo lao Ezekiel Maige(Pichani Kulia) kutokana na kashifa aliyomzushia na kusababisha apoteze uwaziri wake. 

Madai ya wakazi wao yametolewa siku chache baada ya Lembeli ambaye pia ni mbunge wa jimbo la Kahama kupokelewa kama shujaa mara baada ya kurejea kutoka bungeni akipongezwa kwa kazi aliyoifanya na kusababisha kuwajibishwa kwa mawaziri wanne wanaotuhumiwa kushindwa kuwajibika katika operesheni tokomeza ujangili. 

Wakazi hao walisema wamelazimika kumtaka Lembeli amuombe radhi Maige ili amsafishe mbunge wao huyo kutokana na tuhuma kali alizomzushia wakati akiwa waziri wa maliasili na utalii akimtuhumu kwa madai yasiyokuwa na ukweli kwamba alihusika na utoroshaji wanyamahai kwenda nje ya nchi kinyume cha sheria. 

Walisema madai yao hayo yanatokana na ukweli alioukiri Lembeli bungeni wiki iliyopita wakati akiwasilisha taarifa ya kamati yake iliyochunguza vitendo viovu vilivyotendwa na askari mbalimbali waliokuwa wakitekeleza operesheni tokomeza ambapo alikiri kutohusika moja kwa moja kwa waziri mwenye dhamana, Khamis Kagasheki.

Akifafanua mmoja wa wakazi hao waliozungumza na Majira jana aliyejitambulisha kwa jina la Masanja Joseph alisema katika taarifa yake bungeni wiki iliyopita Lembeli alimsafisha aliyekuwa waziri wa wizara hiyo (Kagasheki) akidai hakuhusika katika kashfa ya wananchi kutendewa vitendo viovu katika operesheni hiyo bali watendaji wake.

Joseph alisema Lembeli katika taarifa yake bungeni alidai watendaji ndani ya wizara ya maliasili wakiongozwa na katibu mkuu wao Maimuna Tarishi ndiyo wanaostahili lawama na waziri Kagasheki hahusiki moja kwa moja na tuhuma hizo hali ambayo amedai imewashangaza wakazi wa jimbo la Msalala kwamba imekuwa ni tofauti na alivyohukumiwa Maige wakati huo. 

“Taarifa ya Lembeli kutaka kumsafisha Kagasheki inaonesha jinsi gani hata mbunge wetu Maige hakuhusiki moja kwa moja na tuhuma alizozushiwa alipokuwa waziri wa wizara hiyo, maana wakati huo Lembeli alielekeza moja kwa moja tuhuma zilizotolewa kwa mbunge wetu (Maige), leo anadai waziri kama waziri hawezi kuhusishwa moja kwa moja, hii ni ajabu,” 

“Sasa kutokana na kukiri huko ni wazi wakati huo Lembeli hakumtendea haki Maige kwa vile alimshambulia moja kwa moja yeye kama waziri na kushinikiza awajibishwe peke yake katika nafasi aliyokuwa nayo hali ambayo kwa majibu yake hayo ya juzi imeonesha alikuwa na chuki zake binafsi dhidi ya mbunge wetu,” alisema Joseph. 

Hata hivyo Joseph alikumbusha hoja za wabunge wa majimbo ya Nyamagana, Ezekiel Wenje  na Mchungaji Peter Msigwa waliolishauri bunge wakati wa mjadala wa taarifa ya utoroshwaji wa wanyamahai kwenda nje ya nchi ambapo walipinga kitendo cha Maige kuhukumiwa kwa hukumu ya wengi (mob justice)   Mkazi mwingine wa kata ya Isakajana aliyejitambulisha kwa jina moja la Mwanamange alisema baada ya Lembeli kufanikiwa kuwaondoa mawaziri wawili katika wizara moja kuna kila sababu na yeye achunguzwe usafi wake katika kazi hiyo anayoifanya huenda kuna kitu anachonufaika nacho kwa maslahi ya watu wengine au yeye binafsi. 

“Mimi siyo msomi sana, lakini kitendo cha Lembeli kuwawajibisha mawaziri wawili ndani ya wizara moja kimenishitua sana, lakini kwa Maige ndiyo nilibaki na maswali mengi bila ya majibu, maana huyo bwana (Maige) hakupewa nafasi yoyote ya kutoa utetezi wake bungeni, aliwajibishwa moja kwa moja,”  “Kwenye taarifa ya Lembeli juzi kuhusiana na operesheni tokomeza ameonesha wazi kutaka kumtetea Kagasheki, hii inatia hofu ndani ya akili yangu, vipi huyu alimsulubu moja kwa moja na kumnyima nafasi ya utetezi, lakini mwingine amtetee kwa nguvu zote na kutaka kumtupia mzigo huo katibu mkuu wa wizara?” alihoji Mwanamange. 

Alisema binafsi anamshauri Lembeli achukue maamuzi magumu ya kumuomba radhi Maige kutokana na kitendo alichomtendea kwani wakati akimwajibisha alimwajibisha peke yake wakati tuhuma yake ingewagusa pia watu wengi wakiwemo maofisa usalama wa Taifa walioruhusu ndege ya kijeshi kutoka nje ya nchi kuondoka nchini ikiwa na wanyamahai.